Hidop Orang Basudara (Ala Ambon 1)

ilustrasi saudara

"Biar kata sagu cuma salempeng, bage akang jadi dua, akang pung rasa luar biasa. Biar apa deng apa lai, seng bisa lawang."

Warning! (Ini carita ni samua tentang dolo-dolo. Jadi, sapa yang pung masa kacil di Ambon, jang sampe baca ini deng senyum-senyum deng gigi kuning. :D)

Inga dolo, malam-malam dudu deng sudara dong samua di muka ruma. Dudu di atas tembok pagar muka rumah, deng gantong kaki ka bawa. Skali-skali manganga langit deng akang pung bulang pake payong tamba deng akang pung paser bintang. Samua dudu bacarita. Ada yang carita tar sampe-sampe, ada yang carita setang-setang sampe carita bartarkira orang. Kalo su sampe di carita lucu tu, dudu tatawa jua, sampe pegang-pegang poro. Biar Mama deng Papa panggel maso ruma par tidor lai, tapi kalo masi rame di luar tu, Mama jua mengalah. Apalagi tamang-tamang yang iko bacarita tambong.

Dolo di ruma, kalo Mama su abis mamasa, deng katorang baru pulang skola, katong langsung loko piring, timba nasi deng ikang goreng panas-panas, tamba deng sambal merah-merah. Sapa dapa ikang yang paleng basar harus bage deng yang laeng. Abis makang tu, katong samua pi barmaeng di aer, di pante, di kabong. Tapi pi barmaeng harus inga jam mangaji, kalu seng, nanti Mama deng Papa ciki katong ser bitis, deng rotang atau deng pandim.

Deng satu lai yang katong harus inga kalo pi barmaeng, yaitu Mama pung bicara "Jang biking baju banoda, cuci susah-susah, kamong tinggal pake sa.." Kalimat itu tu, katong samua ana-ana Ambon su dengar akang setiap hari, sampe su hapal akang pung kata-kata lengkap deng intonasi. Sedangkan kalo Papa pung pasang akang laeng deng Mama kalo katong pi barmaeng di luar. Papa jaga pasang kata "jang barmaeng jao-jao, ada musim orang pancui ana. Nanti dong potong kamong kapala par biking jambatang." Hahaha, kalo inga kalimat ini ni, katong ana-ana kacil seng barani barmaeng jao. Apalai kalo su lia orang asing di pante atau di aer bajalang deng bawa parang, katong samua lari cikar kasi tinggal baju deng calana di atas paser.

Inga dolo kalo barmaeng mutel deng tamang-tamang. Kalo mutel su abis atau kalah total. Katong pi cari tomi-tomi di balakang ruma par ganti mutel. Atau kalu seng, katong pi cari biji mantanggor di pinggir pante. Kalo su dapa biji mantanggor, katong barmaeng mutel mantanggor di pinggir pante saja. Di akang pung paser-paser karing. Akang pung sadapp saja, apalai kalo orang-orang basar iko dudu barmaeng. Itu tu, katong samu barmaeng sampe adzan magrib datang. Mama tabaos dari jao panggel pulang. La katong maeng basambunyi dari Mama supaya seng dapa ciki. Hahaha

Dolo kalo Papa pi tahlil, di orang kaweng ka, orang basunat ka, orang maninggal ka. Katong samua dudu dalam ruma tunggu antua pulang deng hati deg-degan. Tebak-tebakan, kue tamela apa yang antua bawa. Pas Papa su salam di muka pintu deng pegang kantong tamela , lai deng katong samua lari borong antua. Manggurebe tamela. Sapa kamuka, dia dapa yang paleng enak. Deng sapa yang paleng balakang paling dapa waji deng kue bolu (yang orang Ambon bilang, kue pastiu) :D

Ada lai, dolo kalo pamalas pi mangaji tu, Mama buju katong deng uang saribu atau uang lima ratus. Supaya katong bisa bali gula-gula la makang deng bajalang sampe tampa mangaji. Kalo seng, Mama buju katong deng pisang goreng panas-panas. Yang antua bali dari orang yang jual keku di muka rumah sore-sore.

Ada lai, dolo kalo aer abis di tampayang, Mama jaga suru katong samua pi timba aer di parigi pake jirigen. Katong samua masing-masing pegang satu jirigen supaya tampayang capat pono. Pas su abis isi jirigen, katorang jaga baku uji bajalang capat sampe di tampayang. Bagitu tarus sampe barapa putaran tu. Kalo tampayang su pono tu, Mama kasi katong kasbi goreng kalo seng gagodo pisang. Abis makang kong katong samua maeng bom-bom aer di balakang ruma. Isi plastik deng aer, abis itu biking regu. Siap-siap sudah tu, regu yang paleng lemah yang dapa bom tarus. Hahaha. Abis barmaeng, nanti Mama suruh katong samua mandi di aer, bawa sabong deng handok sa. Asal jang sabong ilang ta anyor di aer.

Satu lai, kalo di tampa mangaji tu. Ada yang jaga konto badiam-badiam tapi akang pung babou sajaaa su talalu amat lai. Kalo su ciom konto pung babou, katong samua langsung baku tudu satu deng laeng. Nanti kalo su ada yang mangaku baru katong lapor ka Bapa Guru mangaji. Atau kalo seng nanti pas pulang katong soktai dia sepanjang jalan sampe di rumah. Haha..

(Ini beta pung carita, mana kamong pung carita?)

*Bersambung... ^_^

Location: